អង់គ្លេស៖ ខ្សែបម្រើឆ្នើមប្រចាំឆ្នាំរបស់ UEFA , N'golo Kante ត្រូវបានអ្នកចាត់ការ Thomas Tuchel របស់ Chelsea បញ្ជាក់ថា កីឡាកររូបនេះបានទទួលរងរបួសក្នុងជំនួប ១-១ ទល់នឹងក្រុមហង្សក្រហមនាថ្ងៃសៅរ៍ ម្សិលមិញនេះ។

នេះមិនមែនជារបួសលើកដំបូងក្នុងរដូវកាលនេះរបស់ខ្សែបម្រើសញ្ជាតិបារាំងខាងលើឡើយ ពោលគឺរូបគេក៏ធ្លាប់ទទួលរងរបួសស្រាលម្តងដែរ អំឡុងការកំដៅសាច់ដុំមុនការប្រកួត UEFA Super Cup ទល់នឹងក្រុម Villarreal នឹងបានអវត្តមានពីការប្រកួតបើកឆាក Premier League ទល់នឹង Crystal Palace ផងដែរ។

សម្រាប់រដូវកាលថ្មី Kante បានបង្ហាញខ្លួនប្តូរចូលក្នុងការប្រកួតទល់នឹង Arsenal កាលពីសប្តាហ៍មុន ប៉ុន្តែត្រូវបានផ្លាស់ប្តូរចេញក្រោយការប៉ះទង្គិចទល់នឹងខ្សែប្រយុទ្ធ Sadio Mane នាកីឡដ្ឋាន Anfield យប់មិញនេះ។

គេមិនទាន់ដឹងអំពីស្ថានភាពរបួសចុងក្រោយយ៉ាងណាទេ សម្រាប់ខ្សែបម្រើ N'Golo Kante ប៉ុន្តែស្ថានភាពពិតជាគួរឱ្យព្រួយបារម្ភសម្រាប់ការប្រកួតជម្រុះ World Cup របស់បារាំងនាខែក្រោយនេះ។ ដោយឡែក ក្រោយបញ្ចប់ការប្រកួតយប់មិញ Chelsea នឹងត្រូវសម្រាកសម្រាប់ការប្រកួតអន្តរជាតិ FIFA Day ដោយនឹងចាប់ផ្តើមយុទ្ធនាការ Premier League ជួបជាមួយ Aston Villa និងការប្រកួត UEFA Champions League ទល់នឹងក្លិបរុស្សី Zenit St.Petersburg៕